Laaste dag in die States

Ons laaste dag in die States en ek besluit om die toer te skip om eerder nog ‘n dag in New York City te wees. Ek en die Girls wat ook so besluit het vang ‘n trein na Penn stasie met al ons bagasie.

Ons eerste stop is die Shake Shack in 8th Ave.

Van daar loop ek my eie pad verby die New York Times gebou.

Dan stop ek by die poskantoor om ‘n poskaart in die pos te gooi en dan aan na Macy’s vir so bietjie shopping. Ok, bietjie genoeg shopping.

Ek wandel deur die winkel op my eie tyd en besluit ek sien nie regtig kans vir ander sightseeing nie, so van daar af kry ek my laaste Starbucks koffie en kry die trein by Penn Stasie (onder Madison Square Garden) na Jamaica stasie  en van daar die Airtrain na JFK. Dit was ‘n fantastiese vakansie, maar ek is nou reg vir huistoe gaan.

Boston en terug

In ‘n bibber koue oggend van Boston stop ons 7:45 by die Quincy Market en word vertel ons gaan daar bymekaar kom na “lunch” oftewel 11:30.  Dis so koud en alles anders maak eers 10 uur oop, so ons kry toe maar ‘n Breakfast en ‘n koppie warm tee en bekyk die plekke rondom die Market.

Van daar kry ons ‘n warm taxi met Uber na die Boston Tea Party Ships en museum vir ‘n uitstekende ervaring.  Die museum personeel is in karakter en as toeskouer is jy deel van die storie! Mens kry ‘n oulike idee van die storie agter die storie en mens kry selfs kans om jou eie krat “tee” in die see te gooi voor jy die toer verder vat en leer hoe was die omstandighede op die skip en van die gebeure na die dag.

Die museum is ingerig met multi media uitstallings wat die geskiedenis letterlik lewendig maak.

Dit was definitief ‘n hoogtepunt van die toer en daarna is ons weer per taxi terug na die bus.

Ons tyd in Boston is net betyds verby voor ons in die koue reën vasgevang word. Ek voel of daar nog meer aan die stad is om te sien en ek wil dit graag weer kom besoek eendag.

Van daar het ons busse geruil om van ons toer groep weg te breek en terug te kom New York toe. Ons het verder weer op ‘n slag moes busse ruil tot ons uiteindelik by ons laaste hotel vir die trippie kom.

Brrr : Niagra – Boston

Ons dag begin by die Niagra rivier waar ons gaan kyk na ‘n maalkolk in die rivier by ‘n punt waar dit van rigting verander. Dis blykbaar die grootste varswater maalkolk in die Amerikas.

Die rivier is nogsteeds magtig, en ‘n groot deel daarvan is afgelei vir die hidroëlektriese stasies aan weerskante van die rivier, in Kanada sowel as die VSA.

Die volgende stop is by ‘n ou fort op die Ontario meer en dit was regtig koud, so ek, Cecilia, Louis en Michelle het daar op die bankie gesit en wag dat die winkel oopmaak vir koffie.

Daarna vat ons die lang pad suidwaarts in die rigting van Boston.

Op Boston is ek beïndruk met die stad se sjarme en ek voel dadelik beïndruk deur die plek.

Ons gaan doen ‘n vinnige toer deur Harvard se kampus om die gevoel te kry.

Daarna stop ons vlugtig by MIT om fotos te neem, maar ongelukkig is daar nie geleentheid vir ‘n toer nie.

Dis koud in Boston, so ons kry aandete by die Boston Coffee Company om warm te wees. More is die Boston marathon en ons loop twee hardlopers raak wat mekaar die eerste keer in 15 jaar weer sien.

Kyk Noord en ry voort

Vandag ry ons 5 ure Noordwaarts na Corning en besoek daar die Corning Museum of Glass. Die uitstallings is regtig iets besonders, en sluit in geskiedkundige glas van die laaste 3500 jaar, moderne en kontemporêre glas en kuns, en demonstrasies van waar glas prakties gebruik word. Ons sluit ons besoek af met ‘n demonstrasie van ‘n glas blaser wat ‘n pragtige pot maak.

Na nog ‘n paar uur is ons by Niagra Falls en ons is net betyds om fotos van die Maid Of the Mist se observasie dek af te neem voordat dit toemaak.

Daarna het ons ‘n paar uur waarin ons kan stap tot by Goat Island en die Three Sisters Islands(so genoem na 3 dogters van ‘n man wat hulle in die winter oor die ys daarheen laat stap het en so trots was daarop dat hy die destydse eienaar gevra het om die eilande na hulle te vernoem.

Ons eet by ‘n Italiaanse plek in ‘n gebou wat vir Chinese toeriste en ingerig is, en dit val my op hoeveel van die toeriste industrie is op die Chinese mark ingerig. Amper oral waar ons kom is daar gidse in Mandaryns beskikbaar.

Oppad na ons hotel word deur ons bederf met ‘n magiese sonsondergang en ek onthou dat die God van Psalm 19 ook hier met ons is.

Lente verjaarsdag in Washington DC

Mens sien die tekens van lente in die blomme en die bloeisels aan die bome en ek besef dis die eerste keer dat ek in die lente verjaar.

Ons dag in Washington skop af by die Lincoln Memorial waar ons ook die Koreaanse oorlog gedenktuin besoek. Van daar loop ek saam met Louis en Michelle nader aan die Obelisk van die Washington memorial en die WWII Memorial. Die indruk is regtig iets groots.

Ons volgende stop is my Capitol Hill waar ons ‘n begeleide toer kry en bietjie meer leer van die Amerikaanse geskiedenis en regering stelsel.

Daarna stap ons na die Smithsonian Institute en besoek ‘n hoeveelheid museums, sowel as beelde tuine. Die Air and Space Museum herinner my aan die verwondering van vliegtuie en ek wonder hoe die mense gevoel het in die era wat die eerste mense gevlieg het. Deesdae is dit redelik alledaags.

Die Hirshhon is ‘n indrukwekkende gebou wat moderne kuns huisves en ook ‘n gesonde beelde tuin. Ek het van die posters gehou.

Na ‘n stappie in die park vind ek en Cecilia ons pad via nog ‘n beelde tuin, van die National Gallery en verkyk ons aan die kunswerke.


Ons bestemming is die Museum of Natural History en ons haak vas by ‘n seisoenale uitstalling van orgideë.

Terwyl ek ‘n epos vir die reis agent stuur, gaan Cecilia aan en ek is nie seker waar om haar te kry nie, maar ek is bang ek mis weer ‘n bus en draf oor die grasperk om die bus te haal. Darem is ek net mooi betyds om saam te gaan vir ‘n foto sessie voor die Wit Huis.

Wat ‘n voorreg is dit om wonderlike ervarings in ‘n ander land te hê, en terselfdertyd talle boodskappe met gelukwense van die wêreld oor te ontvang. Ek is waarlik geseënd met die mense in my lewe

New Jersey – Princeton – Philadelphia – Lancaster -? Washington?

Ons vertrek vanaf ons hotel in New Jersey en ons eerste stop is by Princeton. Dis ‘n pragtige universiteit kampus en ek oorweeg selfs on daar aansoek te doen vir nagraadse studie!

Philadelphia en besoek ‘n monument van vryheid. Die stad was op ‘n stadium die regerende stad terwyl Washington DC in aanbou was.

Ons volgende stop is Lancaster waar ons ‘n museum van ‘n Amish huis besoek. Daar was ook ‘n toer na ‘n werkende Amish plaas maar daar was ‘n miskommunikasie met die Chinese gids, en hy het vir my weggery!

Van daar ry ons aan na ons hotel in die omgewing van Washington

New York vir oulaas

Die helfte van ons groep bly agter by die hotel, die res van ons gaan saam New York toe vir oulaas om free range toerlede te wees vir die dag. Ons spring af by die Bul op Wall Street en verbasend is daar nog niemand as ons daar kom nie.

Brekfis is ‘n gedeelde broodjie by Subway en dan gaan ek en die ander meisies na Century 21 om bietjie ure gaan shop. Ontwerpers name en in sekere gevalle goedkoper as Woollies. Ek loop uit met ‘n sak vol, ingesluit ‘n nuwe jas en ‘n paar tekkies.

Na ek vir Fanie en Flip weer ontmoet het soos afgespreek, loop ons deur Battery Park en vat ‘n trein tot by Pier 83 waar die Intrepid Sea, Air and Space museum lê. Wat ‘n ongelooflike ervaring! Dit is ‘n ou vlieg dek skip wat in ‘n museum verander is. Die uitstallings in die hanger deck vertel stories van die skip en ander van sy soort in die US Navy. Daar is ook ‘n indrukwekkende video oor ‘n geveg met Kamakazi vlieëniers,en dis ongelooflik om te dink die boot het nie gesink nie.

Behalwe die uitstallings is daar ook ‘n roete deur die binnekant van die skip, ‘n ongelooflike versameling vliegtuie en helikopters sowel as ‘n duikboot. Daar is ook ‘n Space shuttle, die Enterprise wat as toets model gebruik is.

Ons ontmoet die groep by die Metropolitain Museum en van daar gaan hulle na Madame Tussauds. Die Suid-Afrikaners gaan weer eens op ‘n free range missie en ons eindig by Carlo’s Bakery, van Cake Boss faam.


Oppad terug kry ons aandete en brekfis by ‘n garage en maak reg om môre oggend na Washington te vertrek.

Guggenheim en Chinatown

Vandag split ons toer op in die wat ry en die wat bly.

Tannie Elsa gaan vandag na haar seun vir die res van die week en ek beplan my dinge so om saam met haar te stap voordat weg aangaan. Die blomme in die sypaadjies raak al hoe weliger soos die lente momentum optel.

Van daar kry ek nog ‘n Starbucks om te kyk hoe spel hulle my naam vandag.

Ek stap weereens deur die mooi karaktervolle strate die immer gewilde Central Park en verkyk my aan die blomme en die bome. Dis merkwaardig hoe dit kan voel of mense glad nie in die stad is nie, en tog is jy in die middel van die stad. Ek verwag ook elke oomblik dat een of ander karakter uit ‘n fliek daar gaan opdaag.

My volgende besoek is aan die Guggenheim Museum.  Absoluut fantasties! Die gebou van Frank Lloyd Wright is amazing in eie reg, tydloos en indrukwekkend.

Net af in die straat is die Met, oftewel die Metropolitan Museum en daar stop ek by ‘n stalletjie om vir my ‘n toeriste skildery te koop.

Die museum het twee uitstallings van kunstenaars wat met spieëls en vorms speel om mosaïek werk te maak op my ‘n indruk maak, ek hoop maar die internet het die inligting oor die kunstenaars.

My gunsteling is die uitstalling van die Impressionistste. Ek is ‘n arm lengte weg van die werk wat geverf is deur die kunstenaars se eie hande. Monet, Manet, Picasso, Telouse-Lautrec, Seurat etc.

12 uur ontmoet ek die res van my toer maters vir ons toer deur Manhattan na die toer agentskap se kantore. Dis onder in China town,en ons kry so bietjie van ‘n verrassing, aangesien ons iets heeltemal anders verwag het en daar is ‘n paar kostes wat verskuil is, o.a die prys dit New York by night tour wat ons gedink het is ingesluit, en die $8 daaglikse fooitjies wat ook ekstra is.
Verder vind ons uit die bus na ons hotel vertrek wees om 7pm, en ons moet die middag ons self vermaak.

Na ‘n pasta in little Italy, kry ons ‘n roomys oppad na die Williamsburg brug en verkyk ons aan die graffiti.

Op die trein terug gaan ek bietjie verder en gaan na die Top of the Rock om vir oulaas die stad te bekyk. Van hier is die Empire State gebou baie indrukwekkend en dis ook nader aan die Central Park, omdat mens baie nader is. Ek stop ook by ‘n Magnolia Bakery vir ‘n beroemde gebak.

Uiteindelik is ons terug by die toer agentskap en ons verlaat die stad oppad na New Jersey, tot by die hotel in East Brunswick

Big Bus en Broadway

Na ‘n bietjie laat slaap is dit tyd om dinge rustiger te vat. Vandag se program sluit in ‘n Big Bus hop on hop off toer en ons kry die bus by die begin punt naby Times Square. Die eerste bus doen ‘n downtown loop en alhoewel ek van die plekke al gesien het, is die kommentaar baie lekker.

Die bus ry verby Wall Street en Battery Park wat weggespoel het tydens die aanslag van hurricane Sandy en tans in herbou is.

Ons klim af by die High Line, ‘n ou spoorweg wat  in ‘n park verander is. Ons loer in by die Chelsea market, ‘n binnenshuise kosmark, en die atmosfeer is heerlik, soos ‘n rustiger weergawe van die Biscuit Mill.

Terug op die bus is die nuwe gids ‘n man wat ‘n meer realistiese uitkyk op die Amerikaners.

Na die bus klaarmaak gaan maak ek ‘n draai by Madame Tussauds en neem kiekies van die bekendes en pose saam met Madiba.

Op die uptown bus loop ek my makkers vag die oggend weer raak, en ons toer op na die West side en Harlem terwyl die gids ons stories vertel van sy kinderdae.

Iets wat my opval oor New York is hoeveel mense met hulle honde stap, wat sin maak, as jy dink almal bly in woonstelle en honde moet ook oefen. Wat snaakser is, is dat ek tot nou toe nog nie een Yorkie gesien het nie, wel baie poedels. Ek neem toe maar ‘n skelm foto van die eerste Yorkie wat ek sien, en kry ‘n tweede een in die deal!

Ek sien ‘n billboard wat sê:
“You are always haunted by the shoes you didn’t buy” Ek dink dit is geldig vir baie dinge  en ervarings in die lewe.

Daar raak ek aan die die slaap terwyl ons deur museum mile ry, en ek mis die Guggenheim wat ek eintlik wou sien.

Die slapie doen my goed, want ek het kaartjies vir Phantom of the Opera die aand. Ek het kaartjies bespreek deur TodayTix, ‘n app wat afslag kaartjies verkoop  en dit vir jou bring na die vertoning die aand.

Wat ‘n belewenis was Phantom! Die dekor, die teater en die musiek is asemrowend! Elke liewe oomblik was die moeite werd! Dis nie verniet die langste show op Broadway nie!

Carnege Hall

Met my lippe geverf en my swart hakskoene wikkel ek stasie toe om aan te tree vir die konsert. Net jammer die treine loop minder gereeld oor naweke. En daar is vertragings op albei lyne. Ek het darem ‘n koor maat wat saam met my reis,en ons sou seker vroeg gewees het as dit nie was vir die trein wat ons per abuis in die verkeerde rigting gevat het nie. Nietemin is ons by die teater voor ons sound check en ons is reg om te sing.

Die massa koor bestaan uit 180 stemme en tydens ons laaste oefening is ons in 4 groepe gedeel en elkeen ‘n line up room toegeken. Ek en my mede soprane wag in Orchestra room 5, ons line up room, en staan in netjiese rye soos wat ons op die verhoog gaan staan. Wanneer dit tyd is loop ons af by die lang spiraal trap en val in plek op die beroemde verhoog.

Dit is voorwaar die mooiste mens gemaakte plek waar ek nog ooit gesing het. Die teater self is merkwaardig, en die akoestiek is om oor huistoe te skryf.
Ek het geen foto’s kon neem nie, maar ‘n mede koorlid se pa in die gehoor het vir ons ‘n kiekie gestuur.

Die optrede was ‘n onvergeetlike belewenis. Die orkes het as eenheid opgetree om melodieë en harmonieë saam met die koor in te vleg en die dirigent het haar ongelooflik goed van haar taak gekwyt. In net 2 dae het sy reg gekry om die koor as eenheid te laat optree en om haar interpretasie van die musiek te laat werk.

Na die konsert was ons by ‘n dinee gereël for konsert organiseerders. Dit was ‘n fees om weer groente te kan eet, en regte vleis! Dit was net so lekker om bietjie met die ander koor lede te gesels.

Toe Rosie’s uiteindelik toemaak het ‘n groep van ons aangeskuif na ‘n kareoke bar en sodoende die pret met nog ‘n ruk verleng. Na een uur was ek so moeg dat ek saam met 3 ander (Liaan, Nicola en Liesie) nog ‘n trein avontuur aangepak het terug na ons hotel in die Bronx.

Wat ‘n ongelooflike aand!